喜茶？東喜茶？HEEKCAA？HEYTEA？

版主懷疑「東喜茶」係冒牌嘢，所以用咗一晚時間查證，已經初步搵到疑似真相，歸納咗幾個疑點，於是就寫咗個blog。

喜茶起源

喜茶嘅前身係「皇茶」，「皇茶」係一間喺2012年喺中山江邊小巷開嘅奶茶店。其後創辦人為咗擴充業務至全國，但係喺畀其他人抄襲，於是喺2015年由「皇茶」更名為「喜茶HEEKCAA」，並由「深圳美西西餐飲管理有限公司」營運。但因為「喜茶」商標已經畀其他人註冊咗，所以深圳美西西餐飲管理有限公司就用咗70幾萬買起人哋已經註冊好嘅商標。雖然「東喜茶」總公司廣州喜茶餐飲管理有限公司同「喜茶」個商標同名，但因為「東喜茶」同「喜茶」唔同名，所以當時深圳美西西餐飲管理有限公司冇買起「東喜茶」呢個商標。

HEEKCAA？HEYTEA？邊個先係真喜茶？

HEEKCAA

HEYTEA

其實呢兩間都係真喜茶！喜茶嘅英文名HEEKCAA係用粵語拼音拼出嚟嘅，但公司為咗往後喺國際發展，所以英文名就改咗做「HEYTEA」。

東喜茶係山寨店？

第一間「東喜茶HEERETEA」就係源於2006年嘅青陽店，係由「廣州喜茶餐飲管理有限公司」營業嘅。開業6年後，即係2012年，「東喜茶」正式成為註冊商標，而當年嘅小店「皇茶」都只係啱啱開，所以仲未有而家「喜茶」嘅存在。不過呢啲都只係官方講法。版主為咗求證就上咗國家商標局睇，發現「東喜茶」呢個商標係喺2012年註冊嘅。所以已經解答到「東喜茶」同「喜茶」係冇關係嘅，而「東喜茶」的確比「喜茶」更早存在。

如果睇唔清楚，可以click入去睇

誰才是芝士奶蓋茶始祖？各大中國奶茶品牌都爭峰標示商標係始祖，「喜茶」都不例外。而事實又係點呢？

喺其他blog睇到，2002年嘅時候已經係有奶蓋茶存在，部份台灣店家開始嘗試做起了芝士奶蓋奶茶。至於內地，大約係開始有店家做起奶蓋茶，而「東喜茶」同「舞茶道」就係其中兩間。至於曾紅爆一時嘅台灣飲品店「Happy Lemon」同「貢茶」，分別都喺2007年同2010年引入嘅芝士奶蓋茶，可見奶蓋茶起源並非「喜茶」或當時嘅「皇茶」。由此可見，「東喜茶」提供奶蓋茶並不足為奇。

所以廣州喜茶餐飲管理有限公司營運嘅「東喜茶」同深圳美西西餐飲管理有限公司嘅「喜茶」並冇關係，亦唔存在抄襲或冒牌問題。

不過唔好幫襯觀塘嗰間，因為佢哋曾經參與侵權行為，「東喜茶」官方已經唔再承認呢間分店，了解詳情按此。

點解而家喺香港見到「皇茶」？

呢間「所謂皇茶」嘅網頁係 http://www.royaltea.tw/index.html ，接受各地加盟，並使用了台灣的「虛擬電話號碼」服務，令有意加盟嘅人以為佢係台灣嘢。雖然網域係用「tw」，不過大家都會見到成個網頁都充斥住「膠」味，間唔中又有簡體字。首頁話呢間「所謂皇茶」源於2011台灣，但簡介由此至終只係講大陸。雖然佢網頁有寫「台灣商標註冊號碼」，但版主喺台灣智慧財產局嘅商標檢索系統搵到呢間嘢喺2016年先至正式喺台灣註冊，仲要係大陸人註冊，所以擺明係假嘢，仲要扮係台灣品牌！

又繁又簡又英嘅官方網站

台灣商標註冊

山寨「皇茶」店面

點解見到「東喜丨原皇茶」？

呢間公司最衰格，又抄「東喜茶」，又抄「皇茶」，又抄「喜茶」！「東喜丨原皇茶」嘅網頁係 http://www.xicha.hk/ ，呢個網頁整得比較精美，令人以為係真嘢。不過眼利嘅朋友就會發現個網頁係「xicha」，又用「hk」網域，一入到去就會發現字體根本同真嘅「東喜茶」唔同。首先，又用簡體字。第二，首頁又話自己係2006年嘅中國東喜茶，但一時又話自己係香港品牌、一時又話自己係「喜茶」，後嚟竟然仲話自己係台灣「原皇茶」，又話「皇茶已更名為東喜」，好似精神分裂咁。最後發現網頁原來只係copy真嘅東喜茶、真嘅喜茶同「所謂皇茶」嘅新聞稿，又唔放商標註冊商標號碼、電話、地址同公司名，只有在線加盟同查詢，心水清朋友一睇已經知呢間係假嘢！

●意外發現●

2018年10月18日更新: 網頁的一幅圖令網主懷疑呢一個係加盟陷阱 (見下圖)

你可以睇到佢幅相上方有「HEEKCAA」倒影，連啲字體都好膠，連真店面嘅相都冇，應該係大陸嘅加盟陷阱，希望政府會加強調查使用「hk」網域嘅懷疑騙子網頁。

總結

所以「東喜茶」同「喜茶」都唔係冒牌，只係背後有太多品牌都抄佢哋，大家記住求證真偽，唔好飲錯！